Энергетика министри Таалайбек Ибраев 25-26-февралда Нарын облусуна жумушчу сапар менен барып, ал жерде Куланак ГЭСинин 100 МВт кубаттуулуктагы курулуш аянтчасынын бир катар энергетикалык объектилери менен таанышкан.
Сапар учурунда долбоорду ишке ашыруунун мөөнөттөрү жана техникалык аспектилери талкууланды. Куланак ГЭСинин башкы инженери Асылбек Сариев курулуштун учурдагы прогресси, аткарылган иштер жана келечектеги пландар тууралуу маалымат берди.
Минэнерго маалыматы боюнча, аянтчага таш- топурак дамбасы, бетон суу өткөрүү курулмалары, суу алуу каналы жана бетон дубал курулууда. Гидроэлектр станциясы үчүн болот суу түтүктөрүн жыйноо жана монтаждоо иштери жүрүүдө, ошондой эле турбиналык блоктун жабдуулары орнотулууда. Мындан тышкары, суу агызуучу канал, жээк коргоочу конструкциялар жана станциянын төмөнкү бөлүгүнүн темир-бетон элементтери курулууда.
Маалымат:
Куланак ГЭСи
Куланак ГЭСи Ат-Башы жана Нарын дарыяларынын куюлушу болгон жерде жайгашкан жана деривациялык ГЭС болуп саналат.
Министр ошондой эле «Жогорку-Нарын каскады» долбоорунун алкагында курулган объектилердин абалы менен таанышкан, анын ишке ашырылышы бир катар себептерден улам токтотулган. Энергетикалык компаниялардын жетекчилери менен талкуулоодо долбоорду кайра жандандыруу, инвестиция тартуу жана анын мындан аркы илгерилетүү маселелери каралды.
Мындан тышкары, министр жана «НЭСК» ААКнын башкы директору Илгиз Сыдыгалиев, ошондой эле Нарын электр тармактарынын кызматкерлери катышкан жыйын өттү.
Маалымат:
Жогорку-Нарын каскады ГЭСи
2012-жылы Кыргызстандын жана Россиянын өкмөттөрү Жогорку-Нарын каскады ГЭСин куруу жана пайдалануу боюнча келишимге кол коюшкан. Проекттик документацияга ылайык, төрт ГЭСтин курулушунун баасы $727 млн. түзгөн. Бирок 2015-жылдын 24-декабрында ошол кездеги КР президенти Алмазбек Атамбаев Россия Камбар-Ата ГЭС-1 жана Жогорку-Нарын каскады долбоорун ишке ашыра албай турганын билдирген. Кийинчерээк, 2016-жылдын 20-январында Жогорку Кеңештин депутаттары Кыргызстандын өкмөтү менен Россия Федерациясы ортосундагы ушул ГЭСтерди куруу жана пайдалануу боюнча келишимдерди жокко чыгарууга добуш беришкен.
