Жыйында Министрлер Кабинетинин башчысы Адылбек Касымалиев катышты. Мындан тышкары, күнөстүү, шамал жана гидроэлектр станцияларын, ошондой эле жылуулук электр станцияларын куруу менен алектенген 15тен ашык компаниянын жетекчилери онлайн жана видео байланыш форматында жыйынга кошулушту.
Күн тартибинде 2023-жылы башталган 5 450 МВт жалпы кубаттуулуктагы күн жана шамал электр станцияларын курууга байланыштуу 12 инвестициялык келишимдин аткарылышы боюнча маселелер каралды.
Ошондой эле 2 239 МВт жалпы кубаттуулуктагы гидроэлектр станцияларын куруу боюнча үч келишим жана 2 685 МВт түзгөн жылуулук электр станцияларын куруу боюнча үч келишим талкууланды.
Адылбек Касымалиев инвесторлордун энергетика секторун жана өлкөнүн экономикасын өнүктүрүүдөгү маанилүүлүгүн баса белгилеп, бардык катышуучуларды жоопкерчиликтүү мамиле жасап, мурда кол коюлган келишимдер боюнча милдеттенмелерди аткарууга чакырды.
