Бул тууралуу ал Turmush маалымат агенттигинин кабарчысына билдирди.
Байзаковдун айтымында, жырткычтар малчыларга чоң зыян келтирип, үй малдарын жеп жатышат.
«Мен 15 жылдан бери жырткыч жаныбарларды аңчылыкка чыгам. Көбүнчө алыскы өрөөндөргө чыгам. 1-февралда малчылар бизге кайрылып, Ак-Шыйрак өрөөнүндө карышкырлар малга кол салып жатканын айтып беришти. Менин кичүү агам Дүйшөнбү Мукалаев менен ошол жакка барып, Бешик жана Туюк капчыгайларында, Ак-Шыйрак өрөөнүнө алып бараткан жолдо, үч чоң карышкырды атып алдык.
Малчылар жырткычтар жоолук малдарды чапканын билдиришти. Ар бир карышкырдын салмагы 50 кгдан ашат. Бул сезондо ондон ашык карышкырды атып алдым жана дагы да жырткычтарга аңчылык кылабыз. Жакында Тон районунун Арчалы деген алыскы өрөөнүнө барып, ал жактан дагы бир карышкырды атып алдык. Азыр карышкырлар тоо боорлоруна чейин түшүп, мал үчүн коркунуч туудурууда», - деди ал.
