Капалов ошондой эле алимент төлөбөгөндөр үчүн жоопкерчилик чараларын күчөтүүнү көздөгөн мыйзам долбоорунун иштелип жаткандыгын маалымдады.
«Биз төлөбөгөндөр үчүн үчтөн жети күнгө чейин административдик камакка алуу чарасын киргизүүнү пландап жатабыз. Мындан тышкары, Кылмыш-жаза кодексинде бирден үч жылга чейин эркинен ажыратуу мүмкүнчүлүгүн караган статья бар. Мыйзам долбоору Жогорку Кеңеште биринчи окуудан өттү», — деди ал.
Капаловдун белгилөөсү боюнча, алименттин өлчөмү карыздардын эмгек акысына жана жашаган аймагына жараша өзгөрүп турат. «Эгер адам жумушсуз болсо, анда ушул аймактагы орточо айлык акы эсепке алынат. Токмокто, мисалы, бир бала үчүн алименттин өлчөмү орточо 7 миң сомдун тегерегинде, балдардын санына жараша», — деп кошумчалады ал.
Генпрокуратуранын «Аткаруу өндүрүшү боюнча айрым мыйзам актыларына өзгөртүүлөрдү киргизүү жөнүндө» мыйзам долбоору жеке сот аткаруучулары институтун киргизүүнү жана алимент төлөбөгөндөр үчүн жазаларды күчөтүүнү карап жатканын белгилеп өтүү керек.
