Мыйзам долбоорунун максаты — өлкөдөгү инвестициялык климатты жакшыртуу
Венчурдук финансылоого байланыштуу мыйзам долбоору биринчи окууда Жогорку Кенештин илим, билим берүү, инновациялар жана маалыматтык технологиялар, ошондой эле маданият, спорт жана жаштар иштери боюнча комитети тарабынан каралды.
Президенттин алдындагы Улуттук инвестиция агенттигинин директорунун орун басары Жалын Жээналиев мыйзам долбоорунун негизги максаты стартаптар жана инновациялык компаниялар үчүн венчурдук капитал жаатында жагымдуу инвестициялык климатты түзүү экенин белгиледи.
Мыйзам долбоорунун алкагында «венчурдук финансылоо», «венчурдук инвестор», «венчурдук башкаруучу», «венчурдук фонд», «бизнес-ангел», «стартап», ошондой эле «опциондук келишим» жана «опциондор пулу» сыяктуу терминдерди мыйзамда киргизүү жана бекитүү пландалууда.
Талкуу учурунда депутат Болот Сагынаев стартаптарга венчурдук инвестицияларды колдоо механизмдерине жана венчурдук фонддордун ишмердүүлүгүн жөнгө салууга көңүл бурду.
Депутат Салтанат Аманова венчурдук финансылоонун өзгөчөлүктөрүнө, венчурдук фонддордун уставдык капиталынын минималдуу жана максималдуу өлчөмдөрүнө байланыштуу маселелерди көтөрдү.
Мындан тышкары, депутат Гулшаркан Култаева венчурдук фонддордун ишин уюштуруу жана жөнгө салууга коюлган талаптарды талкуулады.
Талкуулардын жана добуш берүүнүн жыйынтыгында мыйзам долбоору комитеттин мүчөлөрү тарабынан жактырылды.
