2026-жылы Resiland долбоорунун алкагында Кыргызстандагы төрт облуста селден коргоо үчүн курулуш жана калыбына келтирүү иштери башталат. Бул, калктуу конуштарды, жолдорду жана айыл чарба жерлерин талкалоочу агымдардан сактоого мүмкүндүк берет. Бул тууралуу Өзгөчө кырдаалдар министрлигинин басма сөз кызматы билдирди.
Берилген маалыматка ылайык, долбоор Ысык-Көл, Ош, Нарын жана Жалал-Абад облустарында 21 участкени камтыйт. Инженердик курулмалар 12 миң турак жайды, 10 миң гектар айыл чарба жерлерин, ошондой эле жолдорду, көпүрөлөрдү, электр өткөрүү линияларын, мектептерди жана бала бакчаларды коргойт.
Курулуш процессинде дамбалар, шпорлор, колдоо дубалдары жана сел өткөрүү каналдары курулат. Бул конструкциялар сел агымдарынын күчүн азайтууга жана кыйроо коркунучун төмөндөтүүгө багытталган.
Иштер Кугарт, Араван-Сай, Гульча жана Ат-Баши дарыяларында, «Жыгач-Коргон-1», «Жыгач-Коргон-2», Пахта-Тобо участокторунда, ошондой эле Гульча жана Оттук айылдарында коргоочу дамбаларды куруу менен башталат.
Курулуш иштерин баштоодон мурун гидрологиялык изилдөөлөр жүргүзүлүп, сунушталган инженердик чечимдердин калктуу конуштарды жана инфраструктураны коргоодогу натыйжалуулугу тастыкталды. Долбоор жердин рельефин, дарыялардын агымдарын жана сел агымдарынын мүмкүн болгон күчүн эске алуу менен иштелип чыккан.
