ЮНИСЕФ уюму Кыргызстандын президенти Садыр Жапаровдун үч жашка чейинки бардык балдар үчүн "Бала ырысы" деген бирдиктүү айлык пособие киргизүү тууралуу жарлыгына ыраазычылык билдирди. Бул тууралуу маалымат уюмдун расмий ресурстарында жарыяланды.
ЮНИСЕФ бул чечим Кыргызстандын балдардын укуктарын коргоого болгон туруктуу берилгендигин көрсөтүп, балдардын эрте өнүгүүсүн колдоо үчүн маанилүү кадам болуп эсептелинерин белгиледи.
ЮНИСЕФтин маалыматы боюнча, жаш балдар үчүн социалдык колдоонун кеңейиши балдардын кедейчилиги менен күрөшүүнүн эң натыйжалуу ыкмаларынын бири болуп, ар бир баланын жашоосунун башынан эле оптималдуу шарттарды түзүүгө жардам берет.
Мындан тышкары, уюм Кыргызстандын 2030-жылга чейин Улуттук өнүктүрүү программасынын алкагында балдардын кедейчилигин 33,1% дан 25% га чейин төмөндөтүү, балдардын социалдык коргоо чараларына жеткиликтүүлүгүн кеңейтүү, баштапкы медициналык-санитардык жардамды жакшыртуу жана мектепке чейинки билим берүү системасын өнүктүрүү пландалганын эске салды.
“Бала ырысы” пособиясынын киргизилиши бул максаттарга жетүүгө жана өлкөдөгү балдардын укуктарын коргоо системасын жакшыртууга маанилүү кадам катары каралууда.
ЮНИСЕФ эл аралык тажрыйбага ылайык, эрте балалыкка салынган ар бир доллар билим берүү натыйжаларын жакшыртуу, ден соолукты жакшыртуу, өндүрүмдүүлүктү жогорулатуу жана теңсиздикти азайтуу аркылуу 13 долларга чейин киреше алып келиши мүмкүн экенин белгиледи.
Уюм ошондой эле Кыргызстандын өкмөтүнө балдарды жана үй-бүлөлөрдү колдоо маселелерине көңүл бурганы үчүн ыраазычылык билдирип, "Бала ырысы" программасын ишке ашыруу жана балдар үчүн социалдык коргоо системасын өнүктүрүү боюнча улуттук өнөктөштөр менен андан аркы кызматташууга даяр экенин билдирди.
