2026-жылдын 1-январынан баштап «Бала Береке» төлөмүн берүү боюнча президенттин жарлыгы күчүнө кирди. Эмгек, социалдык камсыздандыруу жана миграция министрлигинин мамлекеттик жөлөк пулдар бөлүмүнүн башкы адиси Адель Жоомартова «Кабар» агенттигине берген маегинде бул программа боюнча негизги суроолорго жооп берип, анын шарттарын түшүндүрдү.
«Бала Береке» төлөмүн кимдер ала алат?
Бул бир жолку каржылык жардам көп балалуу энелер үчүн, өлкөнүн тоо жана жеткиликтүү эмес аймактарында жашаган энелер үчүн арналган. Программа алкагында, көп балалуу энелер төртүнчү жана андан кийинки балдарды төрөлгөндө төлөм ала алышат.
- 4-баланы төрөлгөндө 100 миң сом;
- 5-баланы төрөлгөндө 600 миң сом;
- 7-баланы төрөлгөндө 1 миллион сом;
- 8-баланы төрөлгөндө 1 миллион 200 миң сом;
- 9-баланы төрөлгөндө 1 миллион 500 миң сом;
- 10-баланы жана андан кийинки балдарды төрөлгөндө 2 миллион сом.
Төлөмдү алуу үчүн эмне керек?
«Бала Береке» төлөмүн алуу үчүн негизги шарт - арыз бергенге чейин эки жылдан кем эмес убакыт бою тоо жана жеткиликтүү эмес аймактарда туруктуу жашоо.
«Төлөм бала бир жашка чыкканда берилет. Мисалы, эгер эне ушул жылы төртүнчү баласын төрөлтсө, ал бала бир жашка чыкканда төлөм үчүн арыз бере алат. Төлөм үчүн арыз 2027-жылдын 1-январынан баштап берилет», — деп белгиледи адис.
Ошондой эле, бала бир жашка чыккандан кийин алты айдын ичинде арыз берилиши керек экенин эске алуу маанилүү. Эгер бул мөөнөт өткөрүлүп кетсе, арыз кабыл алынбайт жана төлөм берилбейт. Ошондуктан, баланын бир жарым жашка чыгуусунан мурун документтерди тапшыруу өтө маанилүү. Каражат арыз берүүчүнүн банктык эсебине которулат», — деп кошумчалады Жоомартова.
Арыз берүү үчүн кандай документтер керек?
- эненин паспорту (же кайрылманын күбөлүгү);
- балдардын туулгандыгы тууралуу күбөлүктөр;
- көрсөтүлгөн аймакта туруктуу жашоону тастыктаган документтер;
- банк эсебинин номери.
Адель Жоомартованын маалыматына ылайык, алдын ала баалоолор боюнча, 2027-жылдын 1-январынан баштап «Бала Береке» бир жолку төлөмүн 11 миңден ашык бала ала алат.
Эки баланын туулганында төлөм кандай эсептелет?
Эгер үй-бүлөдө үч бала болсо, андан кийин эки бала туулса, алар төртүнчү жана бешинчи балдар катары эсептелет. Бул учурда төлөм төмөнкүдөй болот:
- төртүнчү бала үчүн 100 миң сом,
- бешинчи бала үчүн 600 миң сом.
Ошентип, жалпы төлөм 700 миң сомду түзөт. Бул принцип үч бала туулганда да колдонулат.
