Жолугушуу учурунда транспорт министри Абсаттар Сыргабаев жана анын кесиптештери долбоордун максаттары, техникалык мүнөздөмөлөрү жана ишке ашыруу этаптары тууралуу маалымат беришти.
Келечектеги төрт тилкелүү жолдун узундугу 17 чакырымды түзүп, Бишкектин Түндүк айланма жолунун Молодая Гвардия бульвары менен кесилишинен башталат. Долбоордун алкагында эки деңгээлдүү транспорттук түйүн куруу, ошондой эле жарыктандыруу жана аймакты жашылдандыруу пландалууда.
Ошондой эле, алдыда изилдөөлөр жана долбоорлоо иштеринин күтүлүп жатканы белгиленди.
Мындан тышкары, Чүй облусунда Мраморное жана Виноградное айылдарын байланыштырган узундугу 8,7 чакырымдык эки тилкелүү жол жана көпүрө куруу мүмкүнчүлүгү каралууда.
Транспорт министрлиги бул долбоор транспорт тыгындарын азайтууга, жолдордо коопсуздукту жогорулатууга, инфраструктураны жакшыртууга жана регион аралык байланыштарды өнүктүрүүгө багытталганын белгиледи.
