Кыргызстандын Өзгөчө кырдаалдар министрлигинин делегациясы, министрдин орун басары Эрнест Жусуповдун жетекчилиги менен, табигый кырсыктардан келип чыккан коркунучтарды азайтууга арналган ОЭС министрлеринин 10-Конференциясына катышты.
21 жана 22-январда Исламабадда өткөн конференцияга ОЭС өлкөлөрүнүн өзгөчө кырдаалдар боюнча кызматтарынын өкүлдөрү, ошондой эле эл аралык жана регионалдык уюмдардын өкүлдөрү катышты.
Конференциянын алкагында регионалдык координацияны жакшыртуу, эрте кабар берүү системаларын жана климаттын өзгөрүшү менен байланышкан өзгөчө кырдаалдарга жооп берүү боюнча биргелешкен аракеттерди талкуулоо маселелери каралды.
Иш-чарада Эрнест Жусупов эл аралык жана регионалдык өз ара аракеттенүүнүн маанилүүлүгүнө, кабар берүү жана жооп берүү системаларын жакшыртууга, ошондой эле кырсыктарды азайтуу боюнча иш-чараларды натыйжалуу өткөрүү үчүн биргелешкен аракеттердин зарылдыгына көңүл бурду.
Жыйындын жыйынтыгында катышуучулар 2025-2030-жылдарга карата кырсыктарды азайтуунун ОЭС регионалдык рамка программасын жаңыртып, ОЭС алкагында кызматташтыкты өнүктүрүүгө жана табигый кырсыктарга туруктуулукту бекемдөөгө багытталган Исламабад декларациясын кол койду.
Конференцияда Эрнест Жусупов менен Пакистандагы табигый кырсыктарды башкаруу боюнча улуттук агенттиктин төрагасы Инам Гейдар Маликтин ортосунда эки тараптуу жолугушуу болуп, кызматташтыкты улантуу, тажрыйба алмашуу, кадрларды даярдоо жана биргелешкен машыгууларды өткөрүү маселелери талкууланды.
Тараптар өнөктөштүк мамилелердин маанилүүлүгүн белгилеп, табигый кырсыктардан келип чыккан коркунучтарды азайтуу боюнча биргелешкен иш алып барууга даяр экендиктерин билдиришти, - деп маалымдады министрликтин басма сөз кызматы.
