15-февралда, ишенимдүү мамилелерди бекемдөө жана чек араларда туруктуулукту камсыздоо максатында, Кыргыз Республикасының, Тажикстан Республикасының жана Өзбекстан Республикасынын чек ара кызматтарынын жумушчу жолугушуусу өттү.
КРнын Чек ара кызматынын маалыматы боюнча, иш-чара үч өлкөнүн чек аралары кесишкен жерде, «Достук» стеласынын жанында, чек ара өкүлдөрүнүн жоопкерчилиги аймагында өттү.
Жолугушуунун жүрүшүндө катышуучулар чек арадагы өз ара аракеттенүү, чек ара кызматтарынын ортосунда түз байланыш механизмдерин жакшыртуу жана чек арадагы инциденттерди алдын алуу үчүн аракеттерди координациялоо боюнча маанилүү аспекттерди талкуулашты.
Чек ара аймагында инженердик жана чарбалык иштерди уюштуруу боюнча өз ара аракеттенүү маселелерине, ошондой эле мүмкүн болгон талаш-тартыштарга ыкчам жооп берүү алгоритмдерине өзгөчө көңүл бурулду.
Мындан тышкары, «Достук» стеласынын айланасын көрктөндүрүү боюнча демилгелер, кире бериш жолдорду түзүү жана бекитилген чек ара участкаларында биргелешкен жашылдандыруу долбоорлору талкууланды.
Жолугушуу оң атмосферада өттү, бул тараптардын чек араларды бекемдөөгө, жакшы коңшулук мамилелерди өнүктүрүүгө жана чек ара аймактарында тынчтыкты сактоого даярдыгын тастыктап турат.
