15-октябрь 2025-жылы К.Г. аттуу жаран укук коргоо органдарына арыз менен кайрылган. Анын айтымында, ошол күнү "Т." аттуу тааныш эмес адам Коенкозов көчөсүндөгү үйүнө кирип, жашыруун түрдө 1 000 АКШ долларын жана алтын Cartier маркасындагы алты бриллиант менен 750 пробасы бар билерикти уурдап, кылмыш болгон жерден качып кеткен.
Окуянын натыйжасында Кыргыз Республикасынын Жазык кодексинин 205-беренеси ("Уурдоо") боюнча кылмыш иши козголду.
Текшерүү жана оперативдик иш-чараларды өткөрүү учурунда милиция кызматкерлери шектүүнүн жеке башын аныктап, 1989-жылы туулган Ж.Т. аттуу адамды кармашты. Ал Первомай районунун Ички иштер башкармалыгынын Тергөөнү жүргүзүү кызматына жеткирилди жана Кыргыз Республикасынын Жазык процессуалдык кодексинин 96-беренесине ылайык, Бишкек Шаардык Ички иштер башкармалыгынын убактылуу кармоо жайына жайгаштырылды.
Учурда милиция кармалган адамдын башка окшош кылмыштарга катыштыгын текшерүүдө. Текшерүү уланууда.
