Кышкы Олимпиада 6-февралдан 22-февралга чейин Милан жана Кортина-д’Ампеццо шаарларында (Италия) өтөт. Командага эки спортчу кирди.
Мамлекеттик спорт агенттиги «экипировка эл аралык стандарттарга ылайык түзүлгөн, спортчуларга комфорт, коопсуздук жана мелдештер учурунда жогорку натыйжаларга жетишүү мүмкүнчүлүгүн камсыз кылуу үчүн» деп билдирди.
Параддык форма ак түстө жасалган жана расмий иш-чаралар үчүн арналган, ал эми спорттук форма кара көк түстө болуп, машыгуулар үчүн колдонулат. Параддык комплектке салттуу баш кийим — ак калпак кирет.
Ведомстводо экипировканы даярдоо демөөрчүлөрдүн колдоосу менен жана Мамлекеттик физкультура жана спорт агенттиги менен Кыргызстандын Улуттук Олимпиадалык комитети ортосундагы келишимдердин алкагында жүргүзүлгөнүн белгилешти.
Мамлекеттин спортчулары тоо лыжасы жана лыжа жарыштары боюнча мелдештерге катышат.
