Жумгаль районунда, Арал айылында, Түндүк–Түштүк авто жолунда жаңы транспорттук көзөмөл пункту курулат. Бул чечим Транспорт жана байланыш министрлигинин аппаратынын жыйынында кабыл алынды.
Министрликтин маалыматына ылайык, көзөмөл пунктун түзүүнүн негизги максаты жолдордо коопсуздукту камсыздоо, ошондой эле жүк ташуучу унаалардын салмак жана өлчөм боюнча эрежелерге ылайык келүүсүн көзөмөлдөө болуп саналат, бул жолдун асфальттын бузулушун алдын алууга жардам берет.
Мындан тышкары, бул демилге мыйзамсыз жана ашыкча жүк ташуунун учурларын азайтууга, жол инфраструктурасын сактоого жана транспорт тармагында тартипти бекемдөөгө багытталган.
Министрлик ошондой эле өлкө боюнча көп жылдардан бери жаңыланбаган учурдагы транспорттук көзөмөл пункттарын этап-этабы менен капиталдык оңдоодон өткөрүүнү пландап жатат.
Курулуш жана оңдоо иштеринин каржылануы президенттин демилгеси менен түзүлгөн Стабилизациялоо фондунан жүргүзүлөт.
