2026-жылдын 2-февралында Кыргыз Республикасынын Табигый ресурстар, экология жана техникалык көзөмөл министрлигинде министр Медер Машиев жана Кореянын эл аралык кызматташтык агенттигинин (KOICA) өкүлдөрүнүн катышуусунда жолугушуу өттү.
Бул иш-чаранын алкагында Кыргызстандагы атмосфералык абанын сапатын жакшыртууга багытталган программаны ишке ашыруу боюнча деталдар талкууланды. 2026-2028-жылдарга пландалган долбоор Бишкек шаары жана Чүй облусун камтыйт.
Программа Түштүк Корея өкмөтүнүн $10 миллионго чейин гранттык жардам менен колдоого алынат жана зыяндуу заттардын чыгарылышын азайтууга, абанын сапатын башкаруу боюнча комплексдүү планды иштеп чыгууга жана мамлекеттик билим берүү мекемелеринде экологиялык таза жылытуу системаларын киргизүүгө багытталат.
