Бул маалыматты Ош шаарынын билим берүү башкармалыгынын жетекчиси Тынчтыкбек Досмуратов билдирди.
Анын айтымында, мектептин эски имараты толугу менен бузулат, анын ордуна заманбап окуу жайы курулат.
«Биз ата-энелер менен жолугушууларды өткөрүп, кырдаалды түшүндүрдүк. Окуучуларды башка мектептерге өткөрүү мүмкүн болбогондуктан, убактылуу онлайн форматта билим берүүнү уюштурууну чечтик», - деди ал.
Облус боюнча капиталдык курулуш башкармалыгынын начальниги Дамир Калыкбердиев жаңы мектеп үч кабаттуу болуп, 1000 окуучуга чейин кабыл ала турганын айтты.
«Азыркы учурда эски имаратты бузуу процесси жүрүп жатат. Биз курулуш компанияларынын бири менен кызматташып жатабыз. Проекттин сметалык наркы боюнча тактоолор жүргүзүлүүдө. Каржылоо республикалык бюджеттен жүргүзүлөт. Эгер баары пландагыдай болсо, жаңы мектеп ушул окуу жылында эшигин ачат», - деп кошумчалады Калыкбердиев.
