Ак-Тал районунун акиминин орун басары Каныбек Эсеналиевдин айтымында, бул иш-чара Нарын облусундагы президенттин ыйгарым укуктуу өкүлү тарабынан уюштурулган үч күндүк пресс-турдун алкагында өттү. Фестивалдын негизги максаты кышкы туризмди өнүктүрүү жана региондун тарыхый жана туристтик жайларын популяризациялоо болду.
Мерекенин жүрүшүндө Ак-Тал жана Нарын райондору иш-чараларга жоопкерчиликти бөлүшүп, аймактын маданий мурасын максималдуу чагылдырууга аракет кылышты:
Ак-Тал району бозо фестивалын уюштуруп, устаттар конокторду бул улуттук ичимдик менен сыйлап, анын даярдоо боюнча салттуу технологияларын көрсөтүштү. Мындан тышкары, жергиликтүү продукциянын көргөзмөсү өткөрүлдү.
Нарын району маданий программаны жана элдик кол өнөрчүлүктүн көргөзмөсүн уюштурууну өзүнө алды. Көргөзмөдө мыкты устаттар, дизайнерлер жана уздар өз иштерин көрсөтүштү.
Фестивалга чет өлкөлүк туристтер жана ЖМК өкүлдөрү менен бирге болжол менен 70 адам катышты. Конокторго улуттук тамак-аштардан тышкары, тарыхый эстеликтер боюнча экскурсиялар сунушталды. Эсеналиев: «Ак-Тал району бозону даярдоонун уникалдуу ыкмаларын көрсөтүп, конокторду тарыхый мурас менен тааныштырып, Нарын району биздин кол өнөрчүлүк искусствосунун жана маданиятыбыздын байлыгын көрсөттү. Көргөзмө региондун мыкты өндүрүүчүлөрүн жана устаттарын бириктирди» деп белгиледи.
