Кыргыз Республикасынын Маданият, маалымат, спорт жана жаштар саясаты министрлиги бүгүн «Толомуш Океевдин» ысымы менен аталган Улуттук кино студиясы «Кыргызфильмдин» продукциясы алдын ала укук ээчиси менен макулдашпастан колдонулбай турганы тууралуу билдирүү жасады.
Кино студиясынан алынган маалыматка таянып, Маданият министрлиги бардык аудиовизуалдык чыгармалар студияга таандык экенин тактады. Бул, көрсөтүү, кайра колдонуу, телевидение аркылуу трансляциялоо же интернетте, анын ичинде социалдык тармактарда жана стриминг платформаларында жайгаштыруу үчүн укук ээчиси менен келишимдин болушу милдеттүү экенин билдирет.
Ведомстводо ошондой эле фильмдерди тиешелүү уруксатсыз колдонуу Кыргызстан мыйзамдарын бузуу болуп эсептелинерин жана юридикалык жоопкерчиликке алып келиши мүмкүн экенин кошумчалашты. Ошентсе да, кино студиясы медиарынок жана башка кызыкдар тараптар менен кызматташууга даяр экенин билдирди.
