Бекитилген документ өлкө аймагында интернетте порнография элементтери бар сайттарга кирүүнү тыюу салган мыйзамды ишке ашыруу үчүн кызмат кылат.
Жаңы тартипке ылайык, ушундай материалдарды таратуучу сайттарды аныктоо жана блоктоо механизмдери белгиленет.
Мындан тышкары, Маданият, маалымат жана жаштар саясаты министрлигинин жобосуна өзгөртүүлөр киргизилди. Эми министрлик блоктолгон порносайттардын реестрин жүргүзүү жана мыйзамдык нормаларды сактабаган интернет-ресурстарды токтотуу же чектөө боюнча чечимдерди кабыл алуу менен алектенет.
Бул мыйзамдын максаты маалыматтык коопсуздукту камсыз кылуу жана жарандарды, анын ичинде жашы жете элек балдарды, кабыл алынгыс контенттен коргоо, ошондой эле тармакта коомдук моралдын нормаларын сактоо болуп саналат.
Токтом расмий жарыяланган күндөн он күн өткөндөн кийин күчүнө кирет.
