Жаңы өзгөртүүлөргө ылайык, бул категориядагы жарандар үчүн чет элдик жарандарга белгиленген жалпы убактылуу жашоо мөөнөттөрү колдонулбайт. Бул алардын чек араны эркин кесип өтүүгө, республикада жашоого жана өлкөдөн чыгууга виза алуу зарылдыгы жок жана убакыт боюнча чектөө болбойт дегенди билдирет.
Инициативанын негиздемесинде, мурдагы Кыргызстандын жарандарынын көпчүлүгү өз мекенине бекем үй-бүлөлүк, социалдык жана экономикалык байланыштарды сактап калганы, кыймылсыз мүлккө ээ болгону, бизнес жүргүзгөнү жана өлкөнүн экономикасына инвестиция салганы көрсөтүлгөн. Мыйзамдын инициаторлору учурдагы миграциялык чектөөлөр бул категориядагы жарандар үчүн ашыкча административдик тоскоолдуктарды жаратууда деп эсептешет.
Мыйзам долбоорунун авторлору сунушталган өзгөртүүлөр жаңы миграциялык статус жаратпастыгын жана күчүндө турган мыйзам нормаларын жокко чыгарбай турганын, болгону бул топтогу адамдардын убактылуу жашоо мөөнөттөрүн жөнгө салуу үчүн атайын шарттарды киргизерин баса белгилешет.
