Бишкекте Кыргыз Республикасынын тышкы иштер министри Жээнбек Кулубаев 2025-жылга карата өлкөнүн тышкы саясатындагы ишмердүүлүгүнүн жыйынтыктарын талкуулаган пресс-конференция өткөрдү. Ведомствонун пресс-кызматы иш-чара тууралуу маалымат берди.
Министр өткөн жыл көп векторлуу жана прагматикалык тышкы саясатты ишке ашырууда маанилүү этап болгонун белгиледи. Кыргызстан эл аралык өнөктөштөр менен саясий диалогду активдүү өнүктүрүп, кызматташтыкты кеңейтти, экономикалык кызыкчылыктарды илгерилетип, чет өлкөдөгү жарандардын укуктарын коргоого көңүл бурду.
2025-жылдын негизги жетишкендиктери катары министр Тажикстан менен чек ара маселесин ийгиликтүү чечүүнү, Кыргыз Республикасынын Түрк мамлекеттери уюмундагы эффективдүү төрагалыгын жана Жамааттык коопсуздук келишими уюмундагы төрагалыгын, ошондой эле Шанхай кызматташтык уюмундагы төрагалыкты баштоону белгиледи.
2026-жылга пландар боюнча министр ШКУдагы төрагалыкты ийгиликтүү ишке ашыруу, экономикалык жана транспорт-логистикалык долбоорлорду өнүктүрүү, экспорттук мүмкүнчүлүктөрдү көбөйтүү жана Кыргыз Республикасынын жарандарын чет өлкөдө мындан ары коргоо сыяктуу приоритеттүү багыттарды белгиледи.
Пресс-конференциянын аягында Кулубаев жергиликтүү жана чет элдик журналисттердин суроолоруна жооп берди.
