Маалыматтарга ылайык, 2026-жылдын 22-январында Жайыл районунун ИИБине жергиликтүү тургундордун бири кайрылган. Ал 2025-жылдын ноябрь айында Кара-Балтадагы лицейлердин биринде иштеген И.Р. менен таанышканын айтып берген.
И.Р. айдоочулук күбөлүк алуу үчүн электрондук базага окуу өтүү тууралуу маалыматты киргизүүгө убада берип, өз кызматтары үчүн 30 миң 600 сом талап кылган. Бирок акчаны алгандан кийин ал байланышта болбой калды жана милдеттенмелерин аткарган жок.
Жыйналган материалдардын негизинде КРнын Кылмыш кодексинин 209-беренеси (алдамчылык) боюнча кылмыш иши козголду.
Текшерүү учурунда милиция кызматкерлери шектүүнүн жеке башын аныктап, аны кармашты. Ал мурда соттолгон И.Р. болуп чыкты, 1966-жылы туулган. Азыркы учурда ал убактылуу кармоо жайында жатат.
Текшерүү уланууда. Чүй облусунун ИИБи кармалган адамдын аракеттеринен жабыркаган бардык адамдарды Жайыл районунун ИИБине кайрылууга же 0701203102 жана 0312221558 номерлерине чалууга чакырат.
