Ысык-Көл облусунда Ак-Суй райондук электр тармактарынын кызматкери, пара талап кылуу боюнча шектелип кармалды. Бул тууралуу Кыргызстандын Улуттук коопсуздук мамлекеттик комитетинин басма сөз кызматы маалымдады.
УКМКнын маалыматына ылайык, 29-январда эсептөө инженери К.М.А. энергетика тармагында пара алуу боюнча кармалган.
Ал Ак-Суй районундагы туристтик ишканалардын ээлеринен электр энергиясын эсептегичте пломбанын жоктугу үчүн айып пулдун суммасын төмөндөтүү үчүн акча талап кылган.
Жыйналган далилдердин негизинде К.М.А. Каракол шаарындагы ички иштер бөлүмүнүн убактылуу кармоо жайына 48 саатка жайгаштырылды. Тагыраак тергөө иштери улантылууда.
