Укук коргоо органдарынын маалыматына ылайык, 2026-жылдын 5-февралында Ысык-Ата районунун ОВДсына 1981-жылы туулган жаран К.А. жардам сурап кайрылган. Ал ошол күнү WhatsApp аркылуу телефон чалуу келип, төрт сандык кодду атап берүүнү сурашканын билдирген. Натыйжада, анын банктардын биринин электрондук капчыгынан 1 миллион 999 миң 6 сом алынып калган.
Окуя боюнча Кыргыз Республикасынын Кылмыш-жаза кодексинин 209-беренеси ("Алдамчылык") боюнча кылмыш иши козголгон.
Тергөө иш-чараларынын жүрүшүндө шектүү катары 1984-жылы туулган жаран Т.Э. аныкталган. Ал Telegram мессенджери аркылуу жарандардан банктын карталарын сатып алып, аларды криптовалюта биржасында иштөө үчүн колдонорун билдирген.
Уурдалган каражаттар үчүнчү жактардан сатып алынган банктын картасына которулгандыгы аныкталган. Карта башка адамдын атына катталган жана уурдалган акчаны накталай алып, кийинчерээк которуу үчүн колдонулган.
Кыргыз Республикасынын Кылмыш-процессуалдык кодексинин 96-беренесине ылайык, жаран Т.Э. кармалып, убактылуу кармоо жайына жайгаштырылган.
Учурда тергөө кылмыштын бардык жагдайларын аныктоо жана мүмкүн болгон шериктерди табуу боюнча иштерин улантууда. Тергөө активдүү стадияда.
