Эдмар Ласерда жетектеген команда вьетнамдык футболчулар менен беттешет.
6-январда өткөн биринчи беттеште кыргызстандыктар Сауд Аравиясынын курамасына утулушту, ал эми Вьетнам Иорданияга каршы жеңишке жетишти.
Жаштар курамасынын деңгээлинде Кыргызстан менен Вьетнам эки жолу беттешкен.
Биринчи оюн 2014-жылы Кореядагы Азия оюндарында өтүп, командалар топтук этаптын акыркы турунда жолуккан. Бул беттеште Вьетнам минималдуу 1:0 эсебинде жеңишке жетишкен, жалгыз гол пенальтиден киргизилген.
Азия оюндарынын регламенти боюнча командага үч тажрыйбалуу оюнчуну кошууга уруксат берилген. Ал курамда Валерий Кашуба, Чолпонбек Эсенкул уулу жана Азамат Байматов, ошондой эле Валерий Кичин, Фархат Мусабеков, Кайрат Жыргалбек уулу жана Муролим Ахмедов сыяктуу футболчулар болгон.
Эки команда ортосундагы экинчи беттеш 2023-жылы Катардагы эл аралык турнире өткөн. Негизги убакыт нөлдүк тең эсеп менен аяктаган, ал эми кыргызстандыктар Мидин Керезбековдун чыгарылышынан кийин азчылыкта ойноп жатышкан. Штрафтык соккулар сериясында Кыргызстан курамасы 5:4 эсебинде жеңишке жетишкен.
