Тез жардам бөлүмүндөгү 24 сааттык иш, адам өмүрү менен түздөн-түз байланышкан чечимдер жана унутулгус чакыруулар тууралуу медик Turmushтун кабарчысы менен бөлүштү.
Жылдыз Тежибаева 1977-жылы Ат-Башы районунун Ак-Моюн айылында төрөлгөн. 1994-жылы орто мектепти аяктагандан кийин медициналык колледжге кирип, 1997-жылы «дарылоо иши» адистиги боюнча билим алган.
Ошол эле жылдан бери Нарын облустук бириктирилген оорукананын тез жардам бөлүмүндө иштейт. 2015-жылдан бери улук фельдшер кызматын аркалап келет, бүгүнкү күндө анын жалпы иш стажы 29 жылды түзөт. Тез жардам — дайыма даяр болууну, ылдам чечимдерди кабыл алууну, сабырдуулук жана адамгерчиликти сактоону талап кылган тармак.
Жылдыздын айтымында, бул кесипте бирдей күндөр болбойт.
Унутулгус оор ЖПТ…
«Бул жайкы мезгилде, майрам күндөрүнүн биринде болду — кайсы майрам экенин азыр эстей албайм. Ошол убакыттан бери он жылдан ашык убакыт өттү. Чакырууну алдык: Ак-Кыя участкасында ЖПТ. Биз келгенде, унаа жолдон чыгып кеткенин көрдүк, жабыркагандар оор жаракат алган. Салонунда жаштар болгон. Тилекке каршы, бир нече адам каза болду, анын ичинде эки кыз. Эки жигит аман калды, алардын абалын текшердик: оорутуу бар, бирок сынган жерлер жок.
Бул окуя мен үчүн өтө оор болду. Ошондо дагы бир жолу, бир мүнөт ичинде өмүр токтоп кала турганын жана жол кырсыктарынын канчалык коркунучтуу экенин терең сезип, түшүндүм. Биз бардык милдеттерибизди аткардык: жардам бердик, көрсөтмөлөргө ылайык иштедик жана тиешелүү кызматтардын келишин күттүк. Мындай кырдаалдарды тез жардам кызматкерлери унутпайт.
Ошондо дагы бир жолу, тагдырдын канчалык болжолдонбосун түшүндүм: адамдар бир унаада бара жатышат, жана бирөө аман калса, экинчиси каза болот», - деди ал.
Жолдо жана үйдө төрөлүү…
«Тез жардамда иштеп жүргөн жылдарымда миңдеген чакырууларга чыктык. Алардын арасында өзгөчө төрөлүү менен байланышкан учурлар эстен кетпейт. Жети жолу мен төрөлүүнү кабыл алууга туура келди: кээде үйдө, кээде түз эле жолдо.
Бир жолу биз аялды төрөт үйүнө алып барат элек. Биз үйдө төрөлүүнү кабыл алууну сунуштадык, бирок ал ооруканга жетүүнү талап кылды. Жолдо кысуу күчөдү, облустук администрациянын имаратына жакындаганда, айым айдоочудан токтоп турууну өтүндү. Жанында анын энеси болду. Мен медициналык эрежелерди сактап, төрөлүүнү кабыл ала баштадым.
Айналадагы адамдар таң калып, эмнеге токтогонубузду карап жатышты. Айдоочу чыгып, алысыраак турууну түшүндүрдү — бул жерде төрөлүү болуп жатат. Ошентип, биз баланы ийгиликтүү кабыл алып, эненин жана баланын ооруканасына жеткирдик. Мындай учурлар өтө кыйын болсо да, эң кубанычтуу учурлардын бири болуп калат», - деди ал.
Ар кандай себептер менен чакырышат
«Кээде тез жардамды «жөнөкөй» себептер менен чакырышат: үй-бүлөлүк уруштан кийин, нервдик чыңалуу, ден соолук начарлаганда, баш ооруганда. Мындан тышкары, зомбулук учурлары да көп болот: күйөөсү аялын урат, ата-энеси баласына, же коңшуларынын ортосунда күч колдонуу менен конфликттер пайда болот — булар да биздин жумушубузга кирет.
Мындай учурлар атайын журналга катталып, мыйзам чегинде тиешелүү органдарга билдирилет. Кээде адам өзүнө зыян келтирүүгө аракет кылган учурлар болот. Мындай учурда биз катуу тартипте иш алып барып, адамды милиция кызматкерлерине өткөрүп беребиз.
Тез жардамдын негизги милдети — тирүү адамдарга жардам берүү. Эгер келгенде адам өлүп калса, биз милдеттүү түрдө милицияга билдиребиз жана кырдаалды аларга өткөрүп беребиз. ЖПТ учурунда ошол эле тартип иштейт», - деди ал.
Акыркы убакта эң оор чакыруулар
«Акыркы айларда оор оорулардан, анын ичинде онкологиялык оорулардан өлүм учурлары көбөйдү. Кээде бизге «өтө оор абал» деген сөздөр менен чакырышат, ал эми келгенде адам өлүп калган болот. Бирок туугандары дагы деле тез жардамды чакырышат. Анткени эч ким жакындарын жоготкусу келбейт. Адамдар үмүттөнүшөт: балким, дарыгерлер башкача айтышат, балким, дагы бир мүмкүнчүлүк бар. Бул — адамдык сезим. Биз аларды түшүнүүгө аракет кылабыз», - деди ал.
