Элимбектин айтымында, бул демилге декабрда сунушталган, анткени Россияга электрондук платформалар аркылуу жеткирүүдө кыйынчылыктар жаралган. Соңку бир жарым ай ичинде кыргыз тарап Евразия экономикалык комиссиясы, россиялык уюмдар жана бизнес менен активдүү кызматташып, алтыдан ашык биргелешкен жыйын өткөрдү.
«Биз өз ара түшүнүшүүгө жетиштик жана электрондук соода платформалары аркылуу жеткирүүнүн моделиндеги өзгөртүүлөрдү бекиттик. Россия Федерациясынын ыйгарым укуктуу органдары, анын ичинде Федералдык салык жана Федералдык бажы кызматтары, ошондой эле Wildberries платформасы биздин ишибизди растады», — деди Каныбек уулу Элимбек.
Ал ошондой эле жакынкы күндөрдө ишкерлер үчүн түшүндүрүү иш-чаралары жана семинарлар пландалып жатканын билдирди.
«Кээ бир өзгөртүүлөр товарларды коштогон документтерге тиешелүү, биз бизнесмендерге аларды кантип туура толтуруу керек экенин көрсөтөбүз. Семинарлардан кийин электрондук платформалар аркылуу товарларды жеткирүү жакын арада башталышы керек», — деп кошумчалады башкармалык башчысы.
