Кыргызстанда, борбор шаар Бишкекти камтып, азыркы учурдан баштап 2026-жылдын июнь айына чейин жергиликтүү өндүрүүчүлөрдүн, фермерлердин жана кол өнөрчүлөрдүн социалдык мааниси бар азыктарын сунуштаган жарманкалары уюштурулат. Бул тууралуу Суу ресурстары, айыл чарба жана кайра иштетүү өнөр жайы министрлигинин басма сөз кызматы маалымдады.
Министрлик өлкөдө негизги азыктар боюнча жетишсиздик жок экенин жана запастар жетиштүү деңгээлде экенин белгиледи. Жарманкалардын максаты - ички рыноктун туруктуу иштешин камсыз кылуу жана калкка сапаттуу товарларды жеткиликтүү баада сунуштоо.
Ар жекшемби Бишкекте шаардык мэрия менен биргеликте уюштурулган жарманкалар өтүп, анда тургундар базар баасынан төмөн баада азыктарды сатып ала алышат.
Бул иш-чаралардын негизги милдеттери баанын өсүшүн токтотуу, социалдык жактан осол топтор үчүн азыктарды камсыздоо, жергиликтүү өндүрүүчүлөрдү колдоо жана рынокто туруктуулукту сактоо болуп саналат.
Борбордо жарманкалар Т. Усубалиев атындагы аянтта, И. Раззаков жана Абдымомунов көчөлөрүнүн кесилишинде, ошондой эле Первомай районундагы Эркиндик бульварында өтөт.
Жарманкалардын катышуучулары белгилүү талаптарга жооп бериши керек: алардын продукциясы санитардык-гигиеналык нормаларды сактоосу, баалары базар баасынан төмөн болушу, ошондой эле райондук агрардык башкармалыктан тастыктоочу катты берүү талап кылынат.
Кошумча маалыматты (0312) 66 14 22 жана 0702 70 20 00 телефондору аркылуу алсаңыз болот.
