Миллердин айтымында, быйыл Россиядан Казакстанга, Өзбекстанга жана Кыргызстанга газ жеткирүү 20%га өстү. Ошол эле учурда «Газпром» Казакстан менен кызматташтыктарын кеңейтүү боюнча сүйлөшүүлөрдү жүргүзүүдө.
«Биз Борбордук Азия менен байланыштарыбызды бекемдөөнү улантуудабыз. Бул жылдын жыйынтыгы боюнча аталган үч өлкөгө газ жеткирүү 20%га артты. Бул маанилүү көрсөткүчтөр. Биз Борбордук Азия регионуна газ экспортун көбөйтүүнү максат кылып жатабыз», — деди ал.
«Газпромбанктын» экономикалык болжолдоо борбору берген маалыматка ылайык, келечектеги беш жылдын ичинде «Газпромдун» Борбордук Азияга газ жеткирүү көлөмү эки эсеге чейин көбөйүшү мүмкүн. Компания мурда европалык керектөөчүлөр үчүн пландаштырган көлөмдөрдү кайра багыттоо үчүн жаңы рынокторду активдүү издеп жатат.
