Жиында министр катышуучулар менен саламаттык сактоо тармагындагы учурдагы реформаларды, анын ичинде медициналык мекемелерди модернизациялоону, эмгек акыны жогорулатууну, инфраструктураны өнүктүрүүнү жана медициналык кызматкерлер үчүн эмгек шарттарын жакшыртууну талкуулады.
Мамлекеттик кызматкерлердин кесиптик өсүшүнө, социалдык колдоого жана жаш адистер үчүн ылайыктуу шарттарды түзүүгө өзгөчө көңүл бөлүндү.
Талкуу учурунда дарыгерлер чет өлкөдөгү иш тажрыйбаларын бөлүшүп, өз идеяларын сунуштап, Кыргызстанда жумушка орношуу жана адаптация боюнча суроолорду беришти.
Жиынды жыйынтыктап, бир нече жаш адистер өз карьераларын өлкөнүн саламаттык сактоо системасында улантуу үчүн кайтып келүүгө даяр экендиктерин билдиришти.
Каныбек Досмамбетов Кыргыз Республикасынын саламаттык сактоо системасы квалификациялуу жана берилген адистерге муктаж экенин белгиледи. Ал мамлекет дарыгерлердин мекенине кайтып келишине кызыкдар экенин жана алардын кесиптик өнүгүүсү менен калктын ден соолугун жакшыртуу үчүн ар тараптуу колдоо көрсөтүүгө даяр экенин баса белгиледи.
