2026-жылдын 25-январында, саат 11:35те, Жайыл районунун ИИБинин дежурдук бөлүмүнө 112 кызматы тарабынан Бишкек–Ош трассасынын 141-келометринде чоң жүк ташуучу унаанын күйүп жатканы тууралуу маалымат келип түштү. Бул тууралуу Чүй облусунун ИИБи маалымдады.
Маалымат катталган соң, окуя болгон жерге тергөө-оперативдик топ жөнөтүлдү.
Тергөө учурунда «MAN» маркасындагы жүк ташуучу унаанын 1981-жылы туулган О.К.га таандык экени аныкталды. Ал жеке нефтепродукттарды ташуу менен алектенет.
2026-жылдын 22-январында О.К. нефтепереработка тармагында иштеген компаниялардын биринен күйүүчү майларды (АИ-92 бензини) ташуу боюнча заказ алган. Айдоочу катары 1989-жылы туулган К.А. жалданган.
25-январда, болжол менен 11:20да, К.А. жүк ташуучу унааны башкаруу менен Ош шаарына 28 тонна нефтепродукттарды ташып бара жатып, түштүк тарапка кыймылдаган. Салондо О.К. дагы болгон.
Кыймылдын учурунда унаанын сол алды дөңгөлөгү жарылып, айдоочунун башкаруусун жоготууга алып келип, жүк ташуучу унаа каршы тилкеге чыгып, оодарылган. Андан кийин өрт чыгып, унаа толугу менен күйүп кеткен. Унаадагы эки адам ошол жерде көз жумду.
Каза болгондордун денелери Жайыл райондук ооруканасынын моргине жөнөтүлдү, анда зарыл экспертизалар дайындалды. Тергөө уланууда.
Ошондой эле, өрттүн натыйжасында нефтепродукттар айлана-чөйрөгө зыян келтирген жок, анткени агып кетүү катталган жок — бардык күйүүчү майлар окуя болгон жерде толугу менен күйүп кеткен.
Чүй облусунун ИИБи айдоочуларга узак сапарга чыгууда унаалардын техникалык абалын кылдат текшерүүнүн зарылдыгын эскертет.
