Берилген маалыматтарга ылайык, бул билим берүү мекемесинин курулушуна республикалык бюджеттен 152 миллион сом бөлүнгөн. Жаңы мектептин имараты 275 окуучуга арналган жана заманбап аудиториялар, китепкана, ашкана, ошондой эле керектүү инфраструктура жана жабдуулар менен камсыздалган.
Касымалиев мурдагы мектеп имараты жергиликтүү тургундарга 50 жыл кызмат кылганын белгиледи.
Мугалимдерге кайрылып, ал өлкөнүн ийгилиги билим берүүнүн сапатына байланыштуу экенин, мамлекет бул үчүн ылайыктуу шарттарды түзүүгө аракет кылып жатканын, анын ичинде мугалимдердин айлык акысынын көтөрүлүшү быйылкы жылдын апрелинен башталарын айтты.
«Бюджеттин мүмкүнчүлүктөрү мугалимдердин, медицина кызматкерлеринин жана маданият тармагынын кызматкерлеринин айлык акыларын көбөйтүүгө мүмкүндүк берет. Соңку бир нече жылда бул билим берүү кызматкерлеринин айлык акысын көтөрүүнүн экинчи жолу. Биз жаңы мектептердин курулушу жана айлык акыны реформалоо жогорку билим берүү деңгели менен бирге жүрүшү керек деп ишенебиз», - деп кошумчалады ал.
