Токтогул районунда фермерлерди колдоо жана айыл чарбасын жакшыртууга багытталган программалар активдүү өнүгүүдө.
Суу ресурстары, айыл чарба жана кайра иштетүү өнөр жайы министрлигинин маалыматы боюнча, региондо интенсивдүү бакчаларды түзүү боюнча долбоор ишке ашырылууда.
Бул долбоордун алкагында 30 гектар аянтта тамчы менен сугат системалары орнотулууда, ошондой эле 15 миң куб метр көлөмдөгү суу резервуарынын курулушу жүргүзүлүүдө. Мындан тышкары, аймак толугу менен тосулуп, коргоо иштерин жүргүзүү пландалууда.
Жер участогу 5 жылга райондук агрардык өнүктүрүү башкармалыгы аркылуу ижарага берилген, бул бакчачылык долбоорлорун узак мөөнөттүү пландоого жана туруктуу өнүктүрүүгө ыңгайлуу шарттарды түзөт.
Быйылкы жылдын март айынан баштап, бул аймакта көчөттөрдү отургузуу иштери башталат. Интенсивдүү бакчачылык технологияларын жана тамчы менен сугат системасын колдонуу суу ресурстарын натыйжалуу жана рационалдуу пайдаланууга мүмкүндүк берет, бул суу жетишсиздиги шартында өтө маанилүү жана фермерлердин ишин кыйла жеңилдетет.
Министрлик тарабынан киргизилген заманбап технологиялар түшүмдүүлүктү жогорулатууга, суу жоготууларын минималдаштырууга жана айыл чарба өндүрүшүнүн туруктуулугун камсыздоого багытталган.
