Кыргызстанда түрк тилдүү мамлекеттер жана Кытай менен эл аралык жүк ташууларды жөнөкөйлөтүү үчүн e-Permit системасы киргизилди. Бул тууралуу КР Транспорт жана коммуникациялар министрлигинен маалымдалды.
Ведомствонун маалыматына ылайык, эми жергиликтүү авто ташуучулар Кытай, Өзбекстан, Түркия жана Азербайжан сыяктуу өлкөлөр менен эл аралык жүк ташууларды жүргүзүп, электрондук уруксаттарды алууга мүмкүнчүлүк алышат.
Бул жаңы ыкма уруксат берүүчү документтерди алмашуунун процессин кыйла жөнөкөйлөтүп, онлайн форматта уруксаттарды алууга мүмкүнчүлүк берет. Бул жеке визит кылуунун жана кезекте күтүүнүн зарылдыгын жоюп, кызмат көрсөтүү убактысын кыскартат.
Мурда уруксат бланктарынын алмашуусу болгону кагаз түрүндө жүргүзүлүп, 2025-жылы 130 миң мындай бланк катталган, алардын даярдыгы жана жеткирүүсү үчүн бюджеттик каражаттар сарпталган.
e-Permit системасы ишенимдүүлүктү, ачыктыкты жана ыңгайлуулукту камсыз кылып, коррупциялык тобокелдиктерди азайтууга жана бюджеттик чыгымдарды кыскартууга көмөктөшөт. «Бул демилгелер Кыргызстанды Борбордук Азиянын логистикалык борборуна айландыруу үчүн шарттарды түзөт. Электрондук системанын киргизилиши менен 2026-жылы мамлекеттик бюджет 500 миллион сомдон ашык суммага толукталат деп күтүлүүдө», - деп айтылат билдирүүдө.
