Сүйлөшүүнүн жүрүшүндө суу камсыздоо системаларын интеллектуалдык башкаруу долбоорун ишке ашыруу боюнча маселелер талкууланды. Долбоорго бөлүнгөн жалпы сумма $10 миллионду түзөт, бул каражаттар кайтарымсыз грант түрүндө берилет.
Долбоор «Озгур» тазалоо станциясын модернизациялоону жана шаардык суу камсыздоо системасын башкарууда санариптик жана «акылдуу» технологияларга өтүүнү камтыйт. Мындан тышкары, адистердин квалификациясын жогорулатуу, мекеменин уюштуруу жана операциялык мүмкүнчүлүктөрүн жакшыртуу, ошондой эле инфраструктураны жаңылоо маселелери каралды. Тараптар долбоорду биргелешип натыйжалуу ишке ашыруу жана узак мөөнөттүү кызматташуу ниеттерин растады, деп айтылат билдирүүдө.
Бул инициатива Ош шаарындагы суу камсыздоону жакшыртууга, ресурстарды рационалдуу пайдаланууга жана жергиликтүү тургундар үчүн кызмат көрсөтүүнүн сапатын жогорулатууга багытталган.
