Курулуш аянттарындагы мыйзам бузуу натыйжасында эки инспектор жумуштан бошотулду. Бул маалымат 19-январда курулуш министри Нурдан Орунтаевдин өткөргөн жыйынында айтылды.
Министрликтин басма сөз кызматынын маалыматы боюнча, жыйын мамлекеттик архитектуралык-курулуш контролунун Департаментинин кызматкерлери менен өткөрүлгөн. 17 жана 18-январда өткөрүлгөн рейддердин жыйынтыктары талкууланды.
Эки күндүк текшерүү учурунда инспекторлордун иши бааланган. Бул текшерүүнүн натыйжасында эки инспектор өз милдеттерин туура аткарбагандыгы үчүн кызматтан алынган.
Министр Департаменттин жетекчилерине курулуш объекттерин көзөмөлдөөнү күчөтүүнү, мыйзам бузулуулардын алдын алууну жана кызматкерлердин жоопкерчилигин арттырууну тапшырды. Ал курулуш иштерин жүргүзүүдө мыйзамдуулукту, уруксат берүүчү документтердин тактыгын жана курулуш нормалары менен эрежелеринин катуу сакталуусун камсыздоо зарылдыгына көңүл бурду.
Ошондой эле 17 жана 18-январда министр өзү борбордогу бир нече курулуш объекттерин текшерген. Ал өлкөдөгү бардык инспекторлорго рейддик иш-чараларды активдештирүүнү тапшырды, бул демек, көзөмөл текшерүүлөрү дем алыш күндөрүндө да улантылат.
