Бул тууралуу Жалал-Абад облусунун Ички иштер башкармалыгынын жол коопсуздугун камсыздоо бөлүмүнөн билдиришти.
Ведомствонун маалыматына ылайык, окуя кечээ, 28-январда, саат 21:00 чамасында болгон.
«Милицияга Манас шаарынын 2003-жылы туулган тургуну кайрылды. Ал төрт тааныш эмес эркек киши «Хендай Соната» унаасы менен келип, анын жүзүн жоолук менен жапканын, күч колдонуп, унаага отургузганын билдирди.
Бул факт боюнча оперативдүү-издөө иш-чараларынын натыйжасында ошол эле күнү шектүүлөр милиция кызматкерлеринин тарабынан кармалып, Манас шаардык ички иштер бөлүмүнүн оперативдүү-тергөө тобуна өткөрүлдү», - деп айтылат билдирүүдө.
Кийинчерээк Жалал-Абад облусунун Ички иштер башкармалыгы 23 жаштагы кызды уурдап кетүүгө шектелип, 32 жаштагы үч жаран жана 33 жаштагы бир жаран кармалганын кошумчалады.
«Тергөө иш-чараларынын жүрүшүндө инспекторлор 23 жаштагы кызды уурдап кеткен жарандарды Кызыл-Сенир айылында кармашканын жана аларды Манас ГОВДсынын тергөө кызматына өткөргөнүн билишти.
Бул кылмыш боюнча шектүү катары 1994-жылы туулган үч жаран жана 1993-жылы туулган бир жаран кармалды. Алар Манас шаарындагы убактылуу кармоо жайына жайгаштырылды», - деп белгилешти облустук милициядан.
