12-февралда Бишкек шаардык ички иштер башкармалыгынын экстремизмге жана мыйзамсыз миграцияга каршы күрөшүүчү кызматкерлери чет өлкөлүктөрдүн иштөөсү мүмкүн болгон тигүү цехтеринде жана башка өндүрүш мекемелеринде текшерүүлөрдү жүргүзүштү.
Бул операциянын натыйжасында милицияга 90дан ашык башка өлкөлөрдүн жарандары жеткирилди. Басма сөз кызматынын маалыматына караганда, бул адамдар Кыргызстанга бир компания үчүн берилген виза менен киришкен, бирок чындыгында башка уюмдарда иштеп жатышкан. Азыркы учурда алардын өлкөдөн чыгарылышы боюнча маселе каралууда.
Мындан тышкары, рейд учурунда чет өлкөлүк жумушчу күчүн мыйзамсыз тартуу жана пайдалануу учурлары аныкталды. Жумуш берүүчүлөргө чет өлкөлүк жумушчуларды тартуу жана пайдалануу эрежелерин бузганы үчүн, Кыргыз Республикасынын административдик кодексинин 93-беренесине ылайык протоколдор түзүлүп, жалпы суммасы 65 миң сомго айыппулдар салынды. Айыппулдар 8ден ашык фирмага салынды.
