Бишкекте уурдалган авто боюнча шектүү кармалды, натыйжасында транспорт каражаты анын ээсине кайтарылды. Бул тууралуу Первомай районунун Ички иштер башкармалыгынын маалымат кызматы билдирет.
Маалыматтарга ылайык, 2025-жылдын 9-октябрында Д.Б. аттуу жаран укук коргоо органдарына кайрылган.
Ал 2025-жылдын 5-октябрында болжол менен саат 18:00дө "KIA PIKANTO" маркасындагы автоунаасын Тоголок-Молдо көчөсүндөгү үйүнүн короосуна таштап, Каракол шаарына кеткенин билдирген. 9-октябрда үйүнө кайтып келгенде, автоунаасынын жок экенин байкаган.
Бул арыздын негизинде Кыргыз Республикасынын Кылмыш кодексинин 211-беренеси (уурдоо) боюнча кылмыш иши козголгон.
Оперативдүү-издөө иш-чараларынын жүрүшүндө 1984-жылы туулган Ж.Б. аттуу шектүү кармалды. Азыркы учурда ал убактылуу кармоо жайында жатат.
Тергөө учурунда уурдалган автоунааны мыйзамсыз ээлеп алган уурдоочу аны 80 миң сомго сатканын жана алынган акчаны өз муктаждыктарына жумшаганын аныктады.
Автоунаа табылып, ишке зат катары тиркелди. Учурда бул кылмышка башка адамдардын катыштыгын аныктоо боюнча иш-чаралар улантылууда, ошондой эле кармалган адамдын мурда ушундай кылмыштарды жасаган-жасабаганы текшерилүүдө.
