Кыргыз Республикасынын Табигый ресурстар, экология жана техникалык көзөмөл министрлигинин экологиялык жана техникалык көзөмөл кызматынын маалыматына ылайык, Баткен облустук башкармалыгынын атайын коргоодагы табигый аймактар жана биоалуулук бөлүмүнүн кызматкерлери укук коргоо органдары менен биргеликте жүргүзүлгөн ыкчам иш-чаралардын жүрүшүндө жапайы ферула ( «сасык чайыр») уруктарын мыйзамсыз ташуу фактысын аныкташты. Кармалган жаран Баткен облусунун Лейлек районундагы Кара-Суу айылында жашаган Э. Ж. болуп, анын колунда жалпы 1 тонна аталган өсүмдүктүн уруктары табылган.
Кылмышкерге Кыргыз Республикасынын укук бузуулардын кодексинин 264-беренесине («Жапайы өсүмдүктөрдүн уруктарын жана (же) алардын бөлүктөрүн сатып алуу жана сатуу тартибин бузуу») ылайык 10 миң сом өлчөмүндө административдик айып пул салынды.
Кыргыз Республикасынын өкмөтүнүн 2013-жылдын 3-майындагы №224 токтомуна ылайык, өсүмдүк дүйнөсүнө келтирилген зыян үчүн 500 миң сом өлчөмүндө доо коюлду.
Экологиялык көзөмөл кызматы мыйзамсыз жапайы өсүмдүктөрдүн уруктарын чогултуу жана сатуу табиятка олуттуу зыян келтирерин эскертишти. Мындай аракеттер биоалуулукка кыскартууга жана экосистемалардын туруктуулугун бузууга алып келет. Табигый ресурстар, экология жана техникалык көзөмөл министрлиги жарандарды табигый байлыктарды мыйзамсыз пайдаланбоого жана табигатты коргоо мыйзамдарын катуу сактоого чакырат.
