Бишкекте укук коргоо органдары жарандарды алдаган деп шектелген адвокатты кармашты, деп билдирди Ички иштер министрлиги.
ИИМдин маалыматына ылайык, К. Э. аттуу жаран кайрылып, эки аз тааныш аял алдамчылык жолу менен чоң суммадагы акчага ээ болушканын билдирген.
Тергөөнүн жүрүшүндө февральдан октябрга чейин 2024-жылы Р. А. жана К. деп өзүн тааныштырган аялдар таасирдүү адамдар менен байланыштары бар экенин айтып, жабырлануучуга батирлер жана унааларды базар баасынан төмөн баада сатып алууга жардам берүүгө убада беришкен. Ушул жардамдын шылтоосу менен шектүүлөр жабырлануучу менен ар кандай жерлерде жолугушуп, натыйжада 90 миң долларды ээлешкен.
Аталган факт боюнча Кыргыз Республикасынын Кылмыш кодексинин 209-беренеси (өзгөчө ири өлчөмдөгү алдамчылык) боюнча кылмыш иши козголду.
Тергөөнүн жүрүшүндө шектүүлөрдүн бири А. Р. аттуу, 1984-жылы туулган, Чүй облусунун тургуну экени аныкталды. Ал 2008-жылдан бери адвокаттык практика менен алектенип, Чүй облусунун адвокатурасынын мүчөсү болуп саналат, деп белгилешти ИИМде.
Тергөөнүн маалыматтарына ылайык, бул аял башка жарандарды да ушундай эле жол менен алдап, алардын акчаларын ээлеп алганы мүмкүн.
Шектүү кармалып, убактылуу кармоо жайына жайгаштырылды. Тергөөнүн жүрүшү уланууда.
Аталган адамдардын аракеттеринин курмандыгы болгон жарандар же кандайдыр бир маалыматка ээ болгондор ИИМдин Тергөөнү жүргүзүү кызматынан +996 503 552 200 телефонуна кайрылуусун өтүнүшөт.
