Жайыл районунун милиция бөлүмүнө 1987-жылы туулган жарандан 8-мартта кайрылуу келип түшкөн. Анын айтымында, 7-мартта белгисиз адамдар WhatsApp аркылуу байланышка чыгып, анын ишенимин утуп, 25 тоннага жакын жүгерини сатып алууну сунушташкан. Жаман ниеттүүлөр эркекти алдын ала төлөм кылууга көндүрүшкөн.
Натыйжада ал 450 миң сомду А.А. аттуу адамдын банк картасына, ошондой эле 162,5 миң сомду башка бир адамдын эсеп номерине өткөрүп берген. Ошентип, жалпы зыян 612 миң сомду түзгөн. Бирок, акча которгондон кийин товар алынган эмес.
Бул окуя боюнча Кыргыз Республикасынын Кылмыш кодексинин 209-1-беренеси ("Үчүнчү жактарга электрондук төлөм каражаттарын, виртуалдык активдин капчыгын жана SIM-карталарды атайылап өткөрүп берүү же сатуу") боюнча кылмыш иши козголду.
Милиция кызматкерлери акча которулган банк картасынын ээсинин жеке башын аныктоого жетишишти. 1988-жылы туулган шектүү Кыргыз Республикасынын Кылмыш процессуалдык кодексинин 96-беренесине ылайык кармалып, убактылуу кармоо жайына жайгаштырылды. Сот тарабынан ага эки айлык камак мөөнөтү белгиленди.
Тергөө шектүү адамдын банк карталарынын маалыматтарын үчүнчү жактарга өткөрүп бергенин аныктады, бул дагы кылмыш жоопкерчилигине тартууга жаткырылат.
Учурда милиция бул кылмышка тиешеси бар башка адамдарды аныктоо боюнча иштерин улантууда. Тергөө уланууда.
Чүй облусунун Ички иштер башкармалыгы SIM-карталарды, банк карталарын жана башка электрондук каражаттарды үчүнчү жактарга өткөрүп берүү кылмыш жоопкерчилигине тартууга жаткырыларын эскертип турат.
