Иш-чарага кок-бору жана байланышкан ат спорту түрлөрү боюнча улуттук федерациялардын делегаттары ар түрдүү өлкөлөрдөн келишти, ал эми кээ бир катышуучулар онлайн форматта кошулушту.
Делегаттарды Маданият жана спорт мамлекеттик агенттигинин директору Казыбек Молдажиев, Көчмөндөрдүн дүйнөлүк оюндарынын секретариатынын жетекчиси Нурсултан Аденов жана башка расмий адамдар тосуп алышты.
Алгач катышуучулар ассоциациянын жетекчилигинин отчетун угушту, анда иштин жыйынтыктары чыгарылып, эл аралык кызматташтыкты мындан ары өнүктүрүү жана бекемдөө боюнча стратегиялык багыттар талкууланды.
Күн тартибинде ассоциациянын жаңы президентини шайлоо маселеси да каралды. Добуш берүүнүн жыйынтыгында Талантбек Кенжеев бул кызматка шайланды.
Башкы катчы болуп Кувватбек Аскарбеков, ал эми вице-президенттер болуп Равшанбек Адхамов (Узбекистан) жана Сергей Савин (Россия) шайланды.
Эл аралык ассоциациянын ардактуу президенттери болуп Аскар Салымбеков жана Набиджан Джураев калды.
Мындан тышкары, конгрессте ассоциациянын уставына өзгөртүүлөрдү киргизүү жана Грузия менен Пакистандан жаңы мүчөлөрдү кабыл алуу чечими кабыл алынды.
Эскерте кетсек, Эл аралык кок-бору ассоциациясы 2023-жылы негизделген жана ошол учурда президент болуп Курманкул Зулушев шайланган. Мындан тышкары, жакында Кыргызстан кок-бору федерациясынын жаңы президенти болуп Акылбек Эшимов шайланды.
Ачык булактардан алынган маалыматтарга ылайык, Талантбек Кенжеев CapstroyKG курулуш компаниясынын генеральдык директору жана негиздөөчүсү. Өткөн жылы ал альпинисттер командасы менен Килиманджаро тоосунун чокусуна ийгиликтүү чыгып кеткен.
