Кыргыз футбол союзунда тренерлерди билим берүү борбору салтанаттуу ачылды. Бул учурдан тартып тренерлерди окутуу жана даярдоо жаңы фондго өткөрүлүп берилет, ал футбол тармагындагы адистерди даярдоодо заманбап жана системалык ыкмаларды киргизүүгө көңүл бурат.
Борбордун негизги максаттары төмөнкүлөрдү камтыйт:
— тренерлерди жана инструкторлорду даярдоонун улуттук системасын өнүктүрүү;
— адистер үчүн билим берүү процессинин сапатын жана натыйжалуулугун жогорулатуу;
— өлкө аймагында квалификациялуу тренерлердин санын көбөйтүү.
Окутуу уюму семинарларды, тренингдерди жана стажировкаларды өткөрүүнү, заманбап машыгуу ыкмаларын киргизүүнү, ошондой эле улуттук жана эл аралык футбол ассоциациялары менен кызматташтыкты орнотууну пландаштырууда. Мындан тышкары, фонд методикалык материалдарды иштеп чыгуу жана тренерлердин кесиптик өсүшү үчүн шарттарды түзүү менен алектенет.
Борбордун директору болуп мурда КФСтин Техникалык бөлүмүндө иштеген Нурсултан Усенов дайындалды.
