Кыргызстанда 2025-жылы 119 жаңы өнөр жай ишканасы ишке киргизилип, 8 451 жумушчу орун түзүлгөн. Бул тууралуу республикалык жыйындын жүрүшүндө, өкмөт башчы Адылбек Касымалиев «Ынтымак Ордо» борборунда билдирди.
Касымалиевдин айтымында, өнөр жайды өнүктүрүүгө 715,6 миллион доллар инвестиция салынган.
Ал акыркы беш жылда өлкөнүн өнөр жай сектору маанилүү өзгөрүүлөргө дуушар болгонун, бул индустриализация программасынын аркасында мүмкүн болгонун белгиледи. Бул мезгил өндүрүштөрдү модернизациялоо, көптөгөн жаңы ишканаларды ачуу, технологиялык жаңылануу жана ички рынокту камсыз кылуу менен белгиленди. Бул тармакты өнүктүрүүгө багытталган мамлекеттик саясат системалуу жактан каралып жатат. Ички жана экспорттук өндүрүштү көбөйтүүгө багытталган ири долбоорлор ишке ашырылууда. Инвестициялык климат жакшырды жана жаңы ишканалар ачылды. “Жүз өнөр жай ишканасы” инициативасынын алкагында 2025-жылы 119 объекти ишке киргизилип, 715,6 миллион доллар инвестиция салынды, бул 8 451 жумушчу орун түзүүгө мүмкүндүк берди», - деди Касымалиев.
«Ынтымак Ордо» борборунда 2025-жылдын жыйынтыктары боюнча республикалык жыйын өтүп жатканын жана ага президент Садыр Жапаров катышып жатканын белгилеп өтүү керек.
Жыйындарга ошондой эле өкмөт мүчөлөрү, мамлекеттик мекемелердин жетекчилери, президенттин аймактардагы ыйгарым укуктуу өкүлдөрү, Бишкек жана Ош шаарларынын мэйлери, ошондой эле райондордун акимдери катышууда.
