Жолугушуунун алкагында 2024-жылдын 24-октябрында Кыргызстандын Улуттук инвестиция агенттиги менен Монголиянын Инвестиция жана соода агенттиги арасында кол коюлган Өз ара түшүнүшүү меморандумун ишке ашыруу маселелери талкууланды.
Тараптар соода-экономикалык жана инвестициялык мамилелерди өнүктүрүүнүн келечегине, анын ичинде өнөр жай, айыл чарба, туризм, «жашыл» экономика жана санариптик өнүгүү сыяктуу тармактарды камтыган маселелерге көңүл бурушту.
Мындан тышкары, Кыргызстандагы инвестициялык климатты жакшыртуу боюнча кадамдар, анын ичинде «Кыргыз Республикасындагы инвестициялар жөнүндө», «Мамлекеттик-жеке өнөктөштүк жөнүндө» мыйзам долбоорлору жана «Венчурдук финансылык» мыйзам долбоорун иштеп чыгуу боюнча демилге каралды.
Ошондой эле, 2025-жылдын июль айында Монголиянын президентинин Кыргызстанга мамлекеттик визити учурунда жетишилген макулдашуулар контекстинде тараптар жеңил, текстиль жана кайра иштетүү өнөр жайында биргелешкен өндүрүштөрдү түзүү мүмкүнчүлүгүн талкуулашты.
Жолугушуунун аягында Кыргыз-Монгол өкмөттөр аралык комиссиясынын 5-отурумунда кабыл алынган чечимдерди ишке ашыруу маселелери, анын ичинде биргелешкен бизнес-миссияларды жана инвестициялык иш-чараларды уюштуруу жөнүндө сөз болду.
