Бишкекте геологиялык тармакты санариптештирүү маселелери талкууланган жыйын өттү. Иш-чараны табигый ресурстар, экология жана техникалык көзөмөл министри Медер Машиев жетектеди. Негизги көңүл «Недра» маалымат системасын тесттик этапка даярдоого бурулду.
Ведомствонун маалыматына ылайык, санариптештирүү алкагында Кыргыз геологиялык кызматында «Недра» геологиялык маалымат системасы активдүү иштелип жатат. Бул процесс системанын функционалдуулугун аныктоо жана анын практикалык колдонууга даярдыгын камтыйт.
Системаны геологиялык кызматтын ишине интеграциялоого жана анын кен пайдалануу тармагында эффективдүү колдонулушуна өзгөчө көңүл бурулууда.
«Азыр «Недра» системасын тесттик режимде ишке ашыруу жана кайра иштеп чыгуу жүргүзүлүүдө. Бул системаны киргизүү геологиялык маалыматтарды эсепке алууну жакшыртууга, ошондой эле геологиялык сектордогу мамлекеттик кызматтардын процессинин ачыктыгын жана сапатын жогорулатууга мүмкүндүк берет», - деп айтылат расмий билдирүүдө.
Системаны иштеп чыгуу ОАО «Түндүк» тарабынан жүргүзүлүүдө. Система физикалык жана юридикалык жактарга геологиялык кызматтарды алуу жана онлайн режиминде арыз берүү мүмкүнчүлүгүн берет.
