Кыргыз Республикасында Балык чарба департаменти балык секторун санариптик трансформациялоого киришет. Бул демилгени ишке ашыруу үчүн ишкерлердин ишин жеңилдетүүгө жана базарды ачык кылууга багытталган бир нече маалыматтык платформалар иштелип чыккан. Негизги жаңылыктардын бири - "Балык жана балык продукциясын көзөмөлдөө боюнча маалыматтык система". Бул система продукциянын бардык жашоо циклин санариптик форматта көзөмөлдөөгө мүмкүндүк берет — импорттолгон балык уругун инкубациялоодон баштап, даяр продукцияны экспортко даярдоого чейин. Бул демилге ветеринардык-санитардык стандарттардын сакталуусун камсыз кылып гана тим болбостон, Кыргызстандын балыгынын эл аралык базарлардагы экспорттук потенциалын да кыйла жогорулатат.
Балык уулоону сүйгөндөр үчүн "Электрондук балык уулоочу билет" системасы азыртан эле жеткиликтүү. Эми спорттук-любительдик балык уулоого уруксат алуу үчүн министрликтин расмий сайтынан же MegaPay мобилдик колдонмосунан QR-төлөмдөрдү колдонуп, оңой эле алууга болот. Бул жаңылык мамлекеттик мекемелерге кайрылуунун жана кагаз документтерди даярдоонун зарылдыгын жоюп жатат.
Ошол эле учурда "Бирдиктүү электрондук реестр балык чарба суу сактагычтары жана субъекттери" АИСи ишке киргизилет. Бул система аркылуу балыкчы-фермерлер мамлекеттик кызматтарды алыстан алууга мүмкүнчүлүк алышат. Атап айтканда, азыр балык чарбасынын паспорту жана балык өстүрүү үчүн биологиялык негиздеме алуу боюнча онлайн арыз берүү мүмкүнчүлүгү жеткиликтүү. Департаментте тармакты масштабдуу санариптештирүү бардык базар катышуучулары үчүн бирдей жана ачык шарттарды түзөт, республикадагы балык чарбасын системалуу түрдө өстүрүүгө көмөктөшөт деп баса белгилешет.
