Бул демилге Виченцада өткөн эл аралык зергердик көргөзмө Vicenzaoro учурунда жүргүзүлгөн сүйлөшүүлөрдүн натыйжасы болду. Bvlgariнин туруктуу өнүгүү жана корпоративдик социалдык жоопкерчилик боюнча директору Элеонора Риццутого болгон жолугушууда кыргыз делегациясы өлкөдөгү зергердик тармактын учурдагы абалы жана анын өнүгүшүнө багытталган мамлекеттик колдоо чаралары тууралуу маалымат берди.
Vicenzaoro — бул зергердик индустриядагы B2B боюнча эң ири эл аралык көргөзмөлөрдүн бири, ал дүйнөнүн төрт бурчундагы өндүрүүчүлөрдү, бренддерди, жабдык жеткирүүчүлөрдү жана эксперттерди бириктирет.
Тараптар Кыргызстандагы адистердин квалификациясын жогорулатуу зарылдыгына көңүл бурушту. Кыргыз зергерлерин Bvlgariде заманбап технологияларды, жогорку сапат стандарттарын жана зергердик өндүрүштүн мыкты практикаларын колдонуу менен окутуу боюнча макулдашууга жетишилди.
ГНСтин маалымат кызматынын маалыматы боюнча, дүйнөдөгү эң ири зергердик бренддердин бири менен кызматташтык адистердин квалификациясын жогорулатып, тармактын экспорттук потенциалын күчөтүүгө жана Кыргызстанда зергердик өндүрүштүн толук циклин өнүктүрүү үчүн шарттарды түзүүгө мүмкүндүк берет.
Bvlgari — италиялык зергердик үй, дүйнөдөгү эң ири люкс класстагы бренддердин бири.
Ал 1884-жылы Римде грек зергер Сотирио Булгари тарабынан негизделген жана башында күмүш зергерликтери менен адистешкен. Азыркы учурда Bvlgari дүйнө жүзү боюнча 300дөн ашык бутиктерде сунушталууда жана дүйнөлүк зергердик индустриянын лидерлеринин бири катары эсептелет.
