Кыргызстанда мектептер арасында окуучуларды которуу үчүн электрондук платформаны киргизүү мүмкүнчүлүгү каралууда. Бул тууралуу өкмөт башчысы Адылбек Касымалиев жакында өткөн өкмөт жыйынында билдирди.
Ал учурда которуу процесси толугу менен кагаз түрүндө жүргүзүлүп жатканын белгиледи.
Адылбек Касымалиевдин айтымында, балдарды билим берүү мекемелерине каттоо үчүн электрондук системанын киргизилиши кабыл алуу процессин кыйла жеңилдетти.
«Башка мектепке баласын которгусу келген ата-энелер жаңы система аркылуу арыз бере алышат. Ал автоматтык түрдө бош орундардын бар экендиги тууралуу маалымат берет. Учурда которуулар кол менен жүргүзүлүүдө, жана Билим берүү министрлиги бул маселе боюнча көңүл бурушу керек. Ата-энелер өз балдары үчүн мектептерди өздөрү тандап жаткан шартта, орундарды эффективдүү бөлүштүрүү маанилүү. Бул билим берүү мекемелерине жүктөмдү азайтууга жардам берет. Баштапкы этапта система шаарларда тестирлениши керек», - деп кошумчалады өкмөт башчысы.
